(Gasteiz,
Bilbo eta Donostiako Elizbarrutietako Irakaskuntza arduradunak)
Isabel Celáa,
Jaurlaritzako Hezkuntza Sailburu ohiaren idazkia argitaratu zen pasa den
asteburuan “Erlijioa ikasmahai artean” izenburupean. Hari hainbat xehetasun
egitera beharturik gaude:
Hasteko eta behin,
emandako datua ez da egi osoa: batxilergoan ikasleen %3ak soilik aukeratu du
erlijio ikasgaia; baina honen atzean dauden arrazoiak isiltzen dira, eta
Hezkuntza Sailak badu horretan zerikusirik. 2008ko Jaurlaritzaren araudi berria
martxan jarri zenetik, Erlijioa ikastordu arruntatik kanpo gelditu zen eta
haren ordezkorik gabe gainera; indarrean dagoen legearen kontrako neurria hartu
zen, orain Epaitegi Gorenaren erabakiak adierazi duen bezala. Hori gutxi ez eta
azken urteotan erlijio ikasgaiaren aurka egin diren arau hausteek,
manipulazioek eta presioek, ikasleria %24tik %3ra eraman dute. Hau da,
“hiltzeko moduko” egin zioten ikasgaiari eta orain, “hilik” dagoela diote.
2012ko Uztailaren 20ko epaiari esker, Epaitegi Gorenak Euskadiko Gotzaindegien
eskaerak entzun zituen; okerra zuzendu eta
Hezkuntza Sailak hartutako norabide desegokia bide onera eraman zuen.
Bestalde ez da egia
erlijio ikasgaia eta katekesia gauza bera direnik, sailburu ohiak dioen moduan.
Hala bada, nola da posible Celáaren Hezkuntza Sailak Euskadiko Agintaritzaren
Aldizkarian Erlijio ikasgaiaren curriculuma onartu eta argitaratzea eta orain
aldiz eduki horiek katekesi hutsa direla esatea? Argi utzi nahi dugu ezin dela
erlijioaren irakaskuntza estrategia politikoen baitan erabili; eta modu berean
ez da zilegi alderdi politiko berri batek boterea hartu bezain pronto,
hezkuntza planak bere pentsaeraren arabera aldatzea (hor ditugu LOGSE, LOCE eta
oraingo LOMCE legeak), inolako
giza-adostasunik gabe.
Argi dago Erlijio
Ikasgaiak, ikuspegi konfesionaletik egiten duela kristautasunaren inguruko
gogoeta, baina horrek ez du inolaz ere esan nahi katekesia denik. Katekesiak
fedearen baitan Jainkoarekin topatzea bilatzen duen bitartean (esperientzia da
batez ere), erlijio klaseak ekintza erlijiosoaren ezagutza
eta edukietan eta horrek gizartean duen eraginean sakontzea du helburu.
Horregatik hain zuzen erlijio katolikoa ikasgaia maiz aukeratzen dute fededun
ez diren eta beste erlijiotako kide diren askok.
Celáa anderearen idazkiak bestalde guztiak
barneratzen dituen estatu laikoaz hitz egiten du, erlijio guztiak errespetatzen
dituena, haiek eman dezaketena kontuan hartzen duena, baina horietako bat ere
ez bere egiten ez duena. Hau da hain justu guk defendatzen duguna. Gizaki
bakoitza bere uste eta sinesmenen arabera hezita izan dadila, Estatuak gizartearekiko
dituen betebeharrak areago eraman gabe eta gizartearen baitan erori gabe; hau
da, gizartea anitza dela kontuan hartu eta ez gaitzala guztiak kolore bakarra
duen ikuspegi ideologiko beretik pasa arazi. Hain zuzen kontzientzia eta erlijio askatasuna da
defendatzen dugun ikuspegi horretatik abiatuta, guraso eta familiei euren
seme-alabak nahiago duten sinesmenaren arabera hezteko ahalmena ematen diena.
Estatuak eta Egoitza
Santuak dituzten akordioen inguruan, azpimarratzekoa, “pacta sunt servanda”:
akordioak bete egin behar dira. Eta Gorenaren epaiak bertan behera uzten du
Euskal Erkidegoan, Batxilergoko azken lau urtetan Erlijio ikasgaia tratatu den
modua. Ez genuke Eliza eta Estatuaren arteko akordiora jo beharko,
administrazioak konstituzioak jasotzen duen kontzientzia eta erlijio askatasuna
errespetatuko balitu. Konstituzioak bete-betean babesten du pertsonaren
heziketa osoa, haren sinesmenaren araberako eskubideak eta askatasuna eta
erlijio eta moral heziketa (27.2 eta 27.3 Art.). Baina
azkenaldiko esperientzia eta historiak behin eta berriz erakusten digute
hezkuntza, antropologia, morala eta erlijio alderdietan batez ere, elementu
ideologiko gisa erabiltzen dela.
Zergatik ez Europako
gainerako herrialdeei begiratu? Horietako gehienetan erlijio ikasgaia, ikasle
eta familien hautaketa asketik abiatuta curriculumaren barnean sartzen da eta
erlijioaren ordezko ezberdinak eskaintzen dira. Erlijio klaseak pertsona duina
egiten duten egiak eta baloreak eskaintzen ditu eta garaiko gizartearekin konpromisoa
hartzeko gai diren gizon-emakumeak hezten ditu. Honen aldeko Europako
Kontseiluko Parlamentu Batzarraren ikuspuntua azpimarratu nahi genuke
(1720-2005 Aholkua): “Hezkuntza eta Erlijioa”, eta baita beste hainbat
dokumentu eta hausnarketa. Izan ere hezkuntza sistematik kanpo utzi nahi den
ikasgai honek, zerikusi handia du heziketa, hori bera izan dadin: heziketa,
hain justu; pertsonari heldutasunera iristen, errealitatea ulertzen eta guztion
onuraren alde gizartearen zerbitzari izaten erakusten dio.
No hay comentarios:
Publicar un comentario